Pak më shumë se një muaj pas emërimit si trajner i Belgjikës, Rudi Garcia është mjaft aktiv dhe së shpejti do të shpallë listën e tij të parë për “play off”-in e “Nations League” kundër Ukrainës. Në një intervistë për “L’Équipe”, ish-trajneri i Romës dhe Napolit tha se ka përgatitur një listë paraprake me 50-55 lojtarë, ndërsa konfirmoi rikthimin e Thibaut Courtois, i cili më parë ishte përjashtuar nga kombëtarja belge pas një konflikti me ish-trajnerin Domenico Tedesco.
“Ai do të kthehet, – siguroi trajneri 61-vjeçar. – Ky është një lajm i shkëlqyer për të gjithë Belgjikën. Unë gjithmonë e kam konsideruar Thibaut si portierin më të mirë në botë. Kam shkuar ta takoj në Madrid përpara ndeshjes Real Madrid-Manchester City (3-1), ku pata mundësinë të takoja edhe De Bruyne dhe Jérémy Doku një ditë para ndeshjes”.
Garcia më pas shtoi: “Po studioj mundësinë për të jetuar në Belgjikë, por tashmë më duket sikur jam 100% belg. Shpresoj ta përfundoj karrierën time si trajner te ‘Djajtë e Kuq’. Do të njihemi shpejt me njëri-tjetrin; kam një marrëdhënie shumë të mirë me Vincent Mannaert, i cili më zgjodhi për këtë post. Duam të krijojmë një dinamikë të re, t’u sjellim lojtarëve një frymë të re. Mbi të gjitha, shpresoj që i gjithë vendi ta mbështesë kombëtaren”.
