Inter po përballet sërish me problemet e vjetra që kanë shoqëruar ekipin në vitet e fundit: epërsitë e humbura, golat e pësuar në minutat e fundit dhe mungesa e përqendrimit në ndeshjet vendimtare. Edhe pse sezoni kishte nisur me pritshmëri të larta, gabimet strukturore janë rikthyer, duke kujtuar periudhat kur zikaltrit humbën tituj që dukej se i kishin në xhep.
Pas ndeshjes me Kairat Almaty, ku Inter fitoi me vështirësi, trajneri Cristian Chivu ngriti tonin ndaj skuadrës, duke i kërkuar më shumë intensitet dhe përqendrim. “Duhet të gjej mënyrën për të rritur nivelin e fokusit tim dhe të lojtarëve,” tha ai, duke pranuar përgjegjësinë për performancën e dobët.
Problemet në fazën mbrojtëse dhe mungesa e reagimit në 15 minutat e fundit të ndeshjeve mbeten plagët kryesore. Sipas statistikave, Inter ka pësuar një të tretën e golave në çerekun e fundit të lojës – një zakon i keq që Chivu është i vendosur ta zhdukë përfundimisht.
