Dy të rinj nga Vora janë arrestuar nga policia pasi akuzohen se furnizonin grupet kriminale me armë, të cilat modifikoheshin me silenciatorë.
Në pranga kanë rënë Arbër Hasa, 19 vjeç dhe Joldi Peca, 20 vjeç.
Të rinjtë u arrestuan në flagrancë teksa lëviznin me automjet në aksin rrugor “Qafë Kashar-Rinas”.
Gjatë kontrollit iu gjetën 4 armë zjarri pistoleta, të cilat nga hetimet dyshohet se do t’iu shiteshin grupeve kriminale, pas modifikimit me silenciatorë. Në momentin e arrestimit, në automjet u gjet dhe 1 mjet prerës (thikë).
Në vijim të operacionit, u krye kontroll në banesën e shokut të të arrestuarve, shtetasit G. Sh., 49 vjeç. Në këtë ambient u gjetën 1 dorezë metalike dhe 1 shkop gome. Për posedim të kundërligjshëm të këtyre sendeve, nisi procedimi në gjendje të lirë për këtë shtetas, për veprën penale “Prodhimi, mbajtja, blerja apo shitja pa leje e armëve të ftohta”.
Armët dyshohet se merreshin nga Kosova. Dy të rinjtë dyshohet se kanë trafikuar armë dhe herë të tjera. Deri tani nuk rezulton të kenë lidhje me persona të tjerë të arrestuar më herët për trafik armësh Kosovë- Shqipëri. Pistoletat shiteshin më pas te grupet kriminale ku çmimet varionin nga 2000 deri në 3000 euro.
