Çdo gjë e ka një fund! Mbrojtësi austriak David Alaba nuk ka ndërmend të qëndrojë më gjatë në Madrid dhe ka ardhur koha që ai të kërkojë një klub të ri.
Detajet: Sipas raportimit të gazetarit të njohur Fabrizio Romano në faqen e tij në rrjetin social X, 33-vjeçari nuk do ta rinovojë kontratën e tij me Real Madridin dhe do të largohet nga klubi në verën e vitit 2026.
Raportohet se Real Madridi nuk ka shfaqur asnjë qëllim për të vazhduar bashkëpunimin me Alaba-n, ndërsa vetë lojtari është i pakënaqur me minutazhin e pakët që po merr te klubi gjatë kësaj periudhe.
David Alaba iu bashkua Real Madridit në vitin 2021 nga Bayern Munich si lojtar i lirë. Gjatë kësaj kohe, ai ka bërë 120 paraqitje për “Los Blancos”, duke shënuar 5 gola dhe duke dhënë 9 asistime.
Gjatë qëndrimit të tij në Madrid, Alaba ka fituar nga dy herë trofeun e Champions League dhe La Liga-n. Gjithashtu, mbrojtësi ka ngritur lart trofeun e Superkupës së UEFA-s, Kupën e Botës për Klube dhe Superkupën e Spanjës.
Kontrata aktuale e Alaba-s me Real Madridin skadon më 30 qershor 2026, ndërsa vlera e tij në treg sipas Transfermarkt vlerësohet aktualisht rreth 4 milionë euro.
