FSHF organizoi një ceremoni mirënjohjeje për Silvinjo, Doriva dhe Pablo Zabaleta, pas përfundimit të aventurës së tyre në krye të Kombëtares shqiptare. Në event morën pjesë drejtues të Federatës, anëtarë të Komitetit Ekzekutiv, ish-futbollistë, sponsorë dhe përfaqësues të medias.
Presidenti Armand Duka falënderoi stafin për punën, përkushtimin dhe mënyrën dinjitoze me të cilën përfaqësuan fanellën kuqezi gjatë më shumë se tre viteve. Ai veçoi si momentin më të rëndësishëm kualifikimin dhe pjesëmarrjen e Shqipërisë në Euro 2024.
Duka theksoi se ndryshimi në stol nuk lidhet me mungesë rezultatesh apo motivimi, por me mbylljen e një cikli dhe hapjen e një etape të re për Kombëtaren. Në shenjë vlerësimi, trajnerëve iu dhuruan fanella të Kombëtares me mbishkrimin “Forever”.
Silvinjo u shpreh krenar për periudhën e kaluar në Shqipëri, duke theksuar se përveç rezultateve sportive, do të mbajë gjithmonë në zemër raportin njerëzor me stafin dhe njerëzit e Federatës.
Edhe Doriva dhe Zabaleta shprehën mirënjohjen e tyre për mikpritjen dhe eksperiencën me Kombëtaren shqiptare, duke lënë të hapur mundësinë për t’u rikthyer në Shqipëri në të ardhmen.
