Vijojnë problematikat në aksin rrugor Qukës–Qafë Plloçë, konkretisht në Lotin e dytë, në afërsi të kthesës së fshatit Trebinjë.
Sipas informacioneve, traseja e rrugës ka pësuar çarje dhe fundosje, duke bërë që qarkullimi të kryhet vetëm në një korsi, pasi kjo pjesë e rrugës konsiderohet e rrezikshme për lëvizjen e automjeteve.
Vlen të theksohet se rruga Qukës–Qafë Plloçë ka shfaqur problematika të shumta, edhe pse ka vetëm 5 muaj që është inauguruar.
Situata u bë më problematike pas reshjeve të muajve nëntor dhe janar, të cilat sollën probleme serioze, ku masive dherash dhe shkëmbinjsh ranë në trupin e rrugës.
Në rastin e parë u gjet një zgjidhje alternative duke hapur një bypass, ndërsa në rastin e dytë rruga u mbyll për rreth 10 ditë.
Më të rrezikuar nga kjo situatë shprehen drejtuesit e mjeteve, të cilët thonë se punimet janë të dobëta dhe se kanë frikë të qarkullojnë në këtë rrugë.
Nga ana tjetër, ata theksojnë se e gjithë kjo situatë e rëndë vjen si pasojë e neglizhencës institucionale dhe grabitjes së milionave eurove të investuara në këtë rrugë.
