Një tjetër tragjedi e rëndë nga fronti i punës: ky është Abaz Basha, vetëm 22 vjeç, që u nda nga jeta pasi një masiv dheu dhe gurësh u shemb mbi të gjatë punimeve për një kanal ujëmbledhës në fshatin Holtë të Gramshit.
Djali nga Burreli, që sipas informacioneve ishte përgjegjës për punimet, nuk mundi t’i mbijetojë rrëshqitjes fatale. Trupi i tij u gjet disa orë pas ngjarjes, nën masivin e rëndë që i mori jetën edhe një tjetër punëtori, Egzon Lleshi, baba i dy fëmijëve.
Vetëm 22 vjeç, me jetë përpara dhe përgjegjësi në shpinë, Abazi është një tjetër viktimë e mungesës së sigurisë në vendin e punës. 7 punëtorë kanë humbur jetën vetëm në 25 ditët e fundit, ndërsa institucionet heshtin dhe firmat vazhdojnë të punojnë pa masa mbrojtëse.
Një jetë e re, një djalë që doli për të punuar e nuk u kthye më. Fotoja e tij sot qarkullon në rrjet – një fytyrë e qeshur, një ëndërr e prerë në mes.
