Real Madrid vazhdon të kryesojë futbollin botëror edhe jashtë fushës. Sipas Forbes, klubi madrilen është shpallur për të pestin vit radhazi si klubi më i vlefshëm i futbollit në botë.
Në renditjen e publikuar nga prestigjiozja amerikane, vlera e Real Madrid arrin në 9.5 miliardë dollarë, plot 2 miliardë më shumë se klubi i dytë në listë. Forbes thekson se vlera e madrilenëve është rritur me 41% krahasuar me vitin e kaluar.
Përveç vlerës së jashtëzakonshme, Real Madrid ka vendosur edhe një tjetër rekord të madh financiar. Gjatë sezonit 2024-25, klubi arkëtoi 1.265 miliardë dollarë, duke kaluar Dallas Cowboys të NFL, që kishin regjistruar 1.23 miliardë dollarë.
Kjo e bën Real Madrid klubin sportiv me të ardhurat më të larta të regjistruara ndonjëherë.
Në raportin e saj, Forbes vlerëson kombinimin mes suksesit sportiv, fuqisë globale të markës, marrëveshjeve të mëdha sponsorizuese dhe rinovimit të stadiumit “Santiago Bernabéu”.
Madrilenët mbeten një nga emrat më të fuqishëm në sportin botëror, me më shumë tituj të Champions League se çdo klub tjetër dhe me një ndikim komercial që vazhdon të rritet.
