Trajneri i Milan-it, Paulo Fonseca, mund të përballet me masa disiplinore pas deklaratave të ashlar në adresë të arbitrit Federico La Penna, pas humbjes ndaj Atalanta-s. Protestat e tij para kamerave kanë shkaktuar polemika të mëdha dhe mund të sjellin pasoja për trajnerin portugez.
Fonseca, i cili rrallë flet për arbitrat, këtë herë nuk kurseu kritikat e tij. Në një intervistë për Sky Sport, ai tha:
“Kam qëndruar i heshtur, nuk kam folur kurrë për arbitrimin. Por të gjithë flasin për këtë, dhe kanë të drejtë. Jam lodhur duke heshtur. Goli i parë ishte një faull i qartë, nuk ka dyshim. Por edhe mënyra si arbitri drejtoi ndeshjen: kundër Milan-it nuk ka asnjëherë dyshime. E di që të jesh arbitër është e vështirë, por jam lodhur duke parë gjithmonë të njëjtat gjëra dhe gjithmonë kundër të njëjtave klube. Nuk ka respekt për Milan-in. Nuk kam frikë të them të vërtetën.”
Ai shtoi gjithashtu:
“Ky arbitër ishte në VAR kundër Udinese-s, shikoni çfarë ndodhi atje. U frikësova për këtë ndeshje.”
Sipas Corriere dello Sport, Prokuroria Federale ka hapur një dosje ndaj Paulo Fonseca. Akuzat e tij ndaj arbitrit La Penna, që sugjerojnë ndikim në ndeshje, konsiderohen shumë serioze dhe pritet një referim disiplinor. Në raste të tilla, mund të shqiptohet një gjobë ose pezullim, në varësi të vlerësimit të shkallës së shkeljes.
Në përgjithësi, gjobat janë dënimi më i zakonshëm në raste të tilla, veçanërisht kur bëhet fjalë për deklarata që dëmtojnë reputacionin e personave ose organizatave brenda CONI, FIGC, UEFA ose FIFA. Por fjalët e Fonseca-s ishin veçanërisht të ashpra dhe erdhën gjatë një fushate sensibilizimi kundër dhunës ndaj arbitrave, duke rritur mundësinë e një pezullimi.
Sipas Corriere della Sera, drejtuesit e arbitrave po shtyjnë për një pezullim, por gjithçka do të varet nga vendimi i Prokurorisë. Aktualisht, nuk përjashtohet asnjë skenar, dhe Fonseca mund të mungojë në ndeshjen e radhës të Milan-it kundër Genoa-s.
Tensionet mes trajnerëve dhe arbitrave janë një temë e nxehtë në futbollin italian, dhe ky rast do të jetë një tjetër provë për sistemin disiplinor të Serie A.
