Florentino Pérez ka dhënë sinjale të forta për projektin e tij sportiv te Real Madrid, në prag të zgjedhjeve presidenciale të klubit.
Në një intervistë për El Español, presidenti aktual dhe kandidati për një mandat të ri deklaroi se të enjten do të bëjë publik transferimin e parë të madh për sezonin e ardhshëm.
“Të enjten do të shpall transferimin e parë të madh të Real Madrid për sezonin e ardhshëm. Të gjithë e dinë cili është projekti im sportiv: të kemi lojtarët më të mirë dhe të vazhdojmë të fitojmë”, u shpreh Florentino.
Ai shtoi se para së dielës do të ketë edhe emra të tjerë për projektin sportiv, ndërsa paralajmëroi se njoftimi për trajnerin do të jetë i shkurtër.
Florentino foli edhe për rivalin e tij në zgjedhje, Enrique Riquelme, duke i hedhur poshtë disa nga premtimet e tij. Ai u ndal veçanërisht te emri i Rodri, duke thënë se nuk beson se ky operacion është i mbyllur.
Presidenti aktual theksoi gjithashtu se Real Madrid duhet të mbetet gjithmonë në pronësi të anëtarëve të klubit. Sipas tij, vlera ekonomike e klubit duhet t’u përkasë atyre dhe të mbrohet nga çdo tentativë për të ndryshuar modelin aktual.
Florentino foli edhe për projektin e “Santiago Bernabéu”, duke theksuar se stadiumi i rinovuar do të vazhdojë të gjenerojë të ardhura të mëdha për klubin dhe do ta ndihmojë Real Madrid të mbetet në majën e futbollit botëror.
