Në konferencën për shtyp para ndeshjes, trajneri i Barcelonës Hansi Flick dha lajmin e fundit për gjendjen e talentit të ri Lamine Yamal, duke konfirmuar se anësori është plotësisht i rikuperuar dhe i gatshëm për finalen e Superkupës së Spanjës.
Flick bëri të ditur se Yamal, i cili nuk startoi në gjysmëfinale ndaj Athletic Bilbao, tani mund të jetë titullar kundër Real Madridit:
“Yamal? Mund të startojë. Të gjithë lojtarët janë gati, qoftë si titullarë, qoftë nga stoli,” u shpreh trajneri.
Ai theksoi edhe rëndësinë e çdo pozicioni, veçanërisht të mbrojtësve të krahut. Flick vlerësoi paraqitjen e Balde ndaj Athletic, por shtoi se finalja do të jetë një ndeshje krejt tjetër:
“Është e rëndësishme që lojtarët të jenë në formën më të mirë. Na duhen në maksimum,” tha ai.
Trajneri i Barcelonës shtoi se vendimet për formacionin final—përfshirë edhe pozicionin e sulmuesit qendror—do të merren pas seancës së fundit stërvitore:
“Kemi opsione për çdo pozicion dhe të gjitha janë të forta. Gjëja kryesore është të fitojmë finalen dhe të bëjmë zgjedhjet e duhura për ekipin.”
Finalja e Superkupës së Spanjës mes Barcelona – Real Madrid luhet nesër, më 11 janar, në orën 20:00 (CET).
