Pas ngjarjes tragjike në Shkodër, ku mbetën të vrarë Armando Pali dhe Liridon Kraja teksa qëndronin në një lokal, reagimet politike nuk kanë munguar. Sekretari i Përgjithshëm i Partisë Demokratike, Flamur Noka, ka shfrytëzuar rastin për të akuzuar ashpër qeverinë dhe Policinë e Shtetit.
Përmes një postimi në rrjetet sociale, Noka e cilësoi policinë si “polici e karteleve” dhe theksoi se qytetarët janë të braktisur nga autoritetet. Ai e përshkroi Shqipërinë si një “narkoshtet”, ku – sipas tij – drejtësia dhe rendi janë lënë në mëshirë të fatit.
Por ajo që ka tërhequr vëmendjen në këtë postim është mënyra e paprecedentë se si Noka i është kthyer një komentuesi. Ky i fundit i kujtoi Nokës episodin ku ai vetë është filmuar duke ushtruar dhunë ndaj efektivëve të policisë gjatë një proteste.
“O muli do ta hash dhe ti p….e satëme, po prit dhe pak se ato grushta kundër policisë do t’i thyejnë dhëmbët më keq se Likja”, i shkruan komentuesi.
Në vend të një përgjigjeje të matur, siç do t’i takonte një funksionari publik, reagimi i Nokës ishte i denjë për gjuhë rruge: “Merr një brisk dhe eja na mbaro punë bashkë me policinë e karteleve.”
Nuk është hera e parë që Noka përplaset verbalisht me qytetarë në rrjetet sociale, duke mos kursyer fjalorin banal, fyes dhe kërcënues.
