Fiorentina mund të përballet me një tjetër largim të rëndësishëm, pasi Inter ka hapur zyrtarisht bisedimet për Dodôn. Sipas gazetarit dhe insider-it të njohur Rudy Galetti, zikaltërit janë të gatshëm të lëvizin që në merkato dimri për mbrojtësin e djathtë 27-vjeçar.
Raportohet se situata e krijuar te Fiorentina ka shërbyer si katalizator për largimin e disa lojtarëve kyç, një moment që Inter synon ta shfrytëzojë. Me Denzel Dumfries që mund të largohet, klubi nga Milano po kërkon një zëvendësues sa më shpejt dhe Dodô shihet si profili ideal për krahun e djathtë të mbrojtjes.
Negociatat mes Interit dhe përfaqësuesve të lojtarit kanë nisur tashmë, ndërsa vetë Dodô thuhet se është i hapur për një transferim në janar. Kjo e bën operacionin edhe më realist për Nerazzurrët.
Dodô iu bashkua Fiorentinës në vitin 2022 nga Shakhtar Donetsk për 15.4 milionë euro. Me fanellën e “Violës” ai ka zhvilluar 135 ndeshje, ka shënuar 2 gola dhe ka dhënë 11 asistime. Kontrata e tij aktuale është e vlefshme deri në 2027, ndërsa vlera e tij në treg, sipas Transfermarkt, vlerësohet rreth 24 milionë euro.
