Finalja e Kupës së Botës do të sjellë një ndryshim të pazakontë dhe shumë të diskutuar. Pushimi mes pjesëve pritet të zgjasë 25 deri në 30 minuta, për shkak të një spektakli muzikor të stilit “Super Bowl”.
Spanja është tashmë në finale, ndërsa kundërshtari do të përcaktohet mes Anglisë dhe Argjentinës. Por përveç betejës për trofeun, ndeshja e madhe do të ketë edhe një risi që mund të ndikojë te ritmi i lojës dhe gjendja e futbollistëve.
Sipas The Times, FIFA pritet të ndryshojë rregullin e zakonshëm të pushimit 15-minutësh, për t’i dhënë hapësirë një shfaqjeje madhështore në stadiumin e New Jersey. Në skenë përmenden emra si Justin Bieber, Shakira, Madonna, BTS, Burna Boy dhe Coldplay.
Edhe pse vendimi nuk është bërë ende zyrtar, raportimi thekson se gjithçka është praktikisht e organizuar. Arbitri i finales do të duhet të miratojë zgjatjen e pushimit me një argument zyrtar, por FIFA thuhet se e ka situatën nën kontroll.
Ky ndryshim mund të ketë ndikim direkt te skuadrat. Një pushim kaq i gjatë mund të prishë ritmin e lojtarëve, që zakonisht janë mësuar të qëndrojnë vetëm 15 minuta në dhomat e zhveshjes. Trajnerët do të duhet t’i mbajnë futbollistët aktivë fizikisht dhe mendërisht, për të shmangur rënien e përqendrimit në pjesën e dytë.
Nga ana tjetër, skuadra që do të ketë vuajtur më shumë në pjesën e parë mund të përfitojë nga ky pushim më i gjatë, duke marrë më shumë kohë për t’u rikuperuar dhe për t’u riorganizuar. Pikërisht për këtë arsye, vendimi mund të ndikojë edhe në fatin e finales.
Një situatë e ngjashme ndodhi edhe në Botërorin e Klubeve, ku FIFA organizoi një shfaqje 24-minutëshe në pushim. Atëherë, vendimi u kritikua nga Chelsea dhe PSG, dy skuadrat që ishin në fushë.
Drejtori i operacioneve të Botërorit, Heimo Schirgi, foli për spektaklin e finales, duke e cilësuar si një bashkim mes muzikës, kulturës dhe futbollit, përpara ndeshjes që do të kurorëzojë kampionin e botës.
Finalja do të mbështesë edhe FIFA Global Citizen Education Fund, një iniciativë që synon të mbledhë 100 milionë dollarë për të zgjeruar aksesin në arsim cilësor dhe futboll për fëmijët në mbarë botën. Nga çdo biletë e shitur në Botëror, një dollar do të shkojë për këtë fond.
FIFA pritet të japë detaje të plota për gjithçka që lidhet me finalen dhe spektaklin e pushimit, por që tani një gjë është e qartë: finalja e Botërorit nuk do të jetë vetëm një ndeshje futbolli, por një event global argëtimi.
