FIFA ka vendosur masa të reja sigurie për tifozët që do të ndjekin nga afër ndeshjet e Kupës së Botës 2026.
Sipas rregullave të reja, tifozët nuk do të lejohen të fusin shishe uji në stadiume. Ndalimi përfshin jo vetëm shishet plastike, por edhe gotat, kanaçet dhe çdo lloj tjetër ene që mund të mbajë lëngje.
Në turnetë e mëparshme, tifozët mund të hynin në stadium me shishe plastike transparente dhe bosh, deri në një litër. Por këtë herë, ky përjashtim është hequr plotësisht.
FIFA e ka justifikuar këtë vendim me arsye sigurie, duke vlerësuar se objekte të tilla mund të përdoren si sende për t’u hedhur nga tifozë të papërgjegjshëm, duke rrezikuar spektatorët, stafin dhe pjesëmarrësit në ndeshje.
Kupa e Botës 2026, që do të zhvillohet në SHBA, Meksikë dhe Kanada, nis më 11 qershor.
