Përballja mes Anglisë dhe Meksikës në fazën e 16 më të mirave të Kupës së Botës 2026 mund të ndryshojë orar për shkak të kushteve atmosferike në Mexico City.
Ndeshja, e programuar të luhet në stadiumin legjendar “Azteca”, rrezikon të zhvendoset në një orar më të hershëm pas parashikimeve për stuhi me rrufe dhe reshje të dendura shiu.
Fillimisht, sfida ishte planifikuar të niste në orën 01:00 të së hënës me orën britanike, por FIFA po diskuton mundësinë që takimi të luhet më herët, në orën 19:00 të së dielës me orën britanike.
Sipas protokolleve të sigurisë së turneut, nëse rrufeja regjistrohet brenda një rrezeje prej rreth 8 miljesh nga stadiumi, ndeshja duhet të shtyhet automatikisht për të paktën 30 minuta.
FIFA ende nuk ka dhënë një konfirmim zyrtar për ndryshimin e orarit, por diskutimet janë duke vazhduar.
Marcus Rashford ka reaguar tashmë për këtë mundësi, duke pranuar se ndryshimi “nuk është ideal”, por theksoi se Anglia duhet të jetë gati për çdo skenar dhe çdo kusht loje.
Përveç motit, Anglia do të ketë edhe një tjetër sfidë të madhe: stadiumi “Azteca” ndodhet 2,240 metra mbi nivelin e detit, ndërsa Meksika ka humbur vetëm dy herë në 89 ndeshje në këtë impiant.
Ndryshimi i mundshëm i orarit mund të krijojë kaos edhe për tifozët anglezë, pasi më shumë se 3 mijë mbështetës pritet të udhëtojnë për këtë ndeshje.
