Chelsea mori një pikë të artë në transfertë ndaj Manchester City-t, duke barazuar 1-1 me një gol dramatik në minutat shtesë. Enzo Fernandez shënoi në 90’+4, duke i dhënë fund një jave të trazuar për londinezët dhe duke e lënë City-n të zhgënjyer, pasi vendasit po mbanin avantazhin që nga pjesa e parë.
City kaloi në epërsi në minutën 42’, kur Tijjani Reijnders përfitoi nga një top i lirë në zonë, kaloi mbrojtjen dhe e dërgoi saktë në rrjetë për 1-0. Chelsea u mbrojt me “bllok të ulët” për pjesën më të madhe të takimit, por u rrit në pjesën e dytë dhe krijoi rastet e veta, edhe pse i mungoi qartësia në finalizim.
Kur ndeshja po shkonte drejt fitores së City-t, erdhi goditja: pas një krosimi të ulët, Fernandez ishte më i shpejti në zonë dhe e shtyu topin në rrjetë në tentativën e tretë, për të ndezur festën e tifozëve miq dhe për t’i marrë City-t dy pikë nga duart.
Për “Qytetarët”, ky është një tjetër hap fals pas barazimeve radhazi, duke i komplikuar më tej objektivat në krye të tabelës. Për Chelsea-n, pika në “Etihad” shërben si sinjal reagimi, sidomos pas largimit të trajnerit dhe një periudhe me shumë paqartësi në klub.
