Raporti i ri i Organizatës Botërore të Shëndetësisë (OBSH) tregon se inteligjenca artificiale (IA) po transformon sektorin e shëndetësisë në Europë, duke ofruar përmirësim në kujdesin për pacientët dhe reduktimin e presionit mbi stafin mjekësor. Megjithatë, aplikimi i saj po bëhet pa masa adekuate mbrojtëse si për pacientët ashtu edhe për punonjësit shëndetësorë.
Kjo analizë ka zbuluar se adoptimi, rregullimi dhe financimi i IA-së në kujdesin shëndetësor ndryshon ndjeshëm mes 50 vendeve në Europë dhe Azinë Qendrore. Afërsisht gjysma e vendeve të anketuara kanë hedhur në treg chatbot-e për pacientët, ndërsa 32 po përdorin mjete diagnostikuese të fuqizuara nga IA, veçanërisht për imazherinë dhe zbulimin e sëmundjeve. Spanja, për shembull, është duke testuar mjete IA për zbulimin e hershëm të sëmundjeve, Finlanda po i përdor ato për të trajnuar punonjësit shëndetësorë dhe Estonia për analizën e të dhënave.
Pavarësisht se 26 vende kanë vendosur prioritetet e tyre për IA-në në shëndetësi, vetëm 14 kanë ndarë fonde për këto iniciativa. Vetëm katër vende – Andorra, Finlanda, Sllovakia dhe Suedia – kanë një strategji kombëtare të dedikuar për IA-në në shëndetje. Dr. Hans Kluge, drejtor i zyrës së OBSH në Europë, theksoi se pa strategji të qarta, mbrojtjen e të dhënave dhe investimin në alfabetizmin në IA, këto mjete mund të përkeqësojnë pabarazitë shëndetësore në Europë.
Një sfidë e madhe është se mjetet IA bazohen në paketat e mëdha të dhënash që mund të kenë defekte, të jenë të prirura apo të paplota, duke shkaktuar gabime mjekësore. OBSH rekomandon që vendet evropiane të sqarojnë përgjegjësinë për këto gabime të shkaktuara nga IA dhe të sigurojnë që strategjitë e IA-së përputhen me objektivat e shëndetit publik.
Në përfundim, Dr. David Novillo Ortiz tha se mungesa e standardeve të qarta mund të bëjë që punonjësit shëndetësorë të hezitojnë të përdorin mjetet IA. Vendet evropiane duhet të testojnë sistemet IA për sigurinë dhe drejtësinë para se ato të përdoren nga pacientët.
