Álvaro Arbeloa nuk i kurseu superlativat për Kylian Mbappé pas fitores në Mestalla, duke e krahasuar francezin me Cristiano Ronaldon. “Nuk ka fjalë për ta përshkruar Kylianin. Mendonim se s’do shihnim më diçka si Cristiano, por ai është në rrugën e tij,” tha trajneri fillimisht për Real Madrid TV, përpara se ta përsëriste mesazhin edhe në konferencën për shtyp: “Pse jo ta kalojë Cris? Nëse dikush mundet, është Kylian.”
Arbeloa vlerësoi fitoren si “një ndeshje shumë serioze dhe me përkushtim”, duke theksuar vështirësinë e të luajturit në Mestalla: “Të luash këtu është si të shkosh te dentisti. E dinim sa e vështirë do të ishte.” Ai nënvizoi edhe faktin se Reali e kontrolloi mirë takimin, duke thënë se Courtois “nuk pati nevojë të bënte asnjë pritje”, si tregues i disiplinës mbrojtëse.
Për golin e Carreras, Arbeloa tha se tregon talentin ofensiv të lojtarit dhe kujtoi se kishte shënuar edhe në ndeshjen e parë ndaj Valencias. Ndërsa për Valverde u shpreh se kudo që luan “është spektakolar”, por se në mesfushë ndjehet më mirë dhe aty mund të shfrytëzohet maksimalisht. Trajneri lavdëroi edhe të riun David Jiménez për paraqitjen, duke e quajtur “lajm fantastik” që lojtarët e akademisë mund të performojnë në këtë nivel.
Sa i përket Trent, Arbeloa theksoi se do të ecet me kujdes pas një periudhe të gjatë jashtë, ndërsa për Carvajal nënvizoi se po përmirësohet çdo ditë dhe se nuk do të marrë asnjë rrezik. Në fund, ai dha edhe mesazhin për të ardhmen: “Mund ta rrisim nivelin tonë deri te brilanca. Kemi shumë hapësirë për përmirësim,” por shtoi se baza mbetet “soliditeti, përkushtimi dhe sakrifica.”
