Duket se largimi i Mohamed Salah nga Liverpool është bërë pothuajse i pashmangshëm. Pas skandalit të fundit dhe deklaratave të tensionuara, klubi ka nisur të kërkojë zëvendësuesin ideal për egjiptianin.
Sipas CaughtOffside, drejtuesit e Liverpool-it e kanë identifikuar anësorin 23-vjeçar të PSG-së, Bradley Barcola, si kandidatin kryesor për të zëvendësuar Salahun. Edhe pse PSG nuk dëshiron ta humbasë talentin francez, raportet theksojnë se, nëse vetë lojtari kërkon transferimin te Liverpool, parizienët nuk do t’i bllokojnë rrugën.
Alternativa e dytë për krahun e djathtë është Antoine Semenyo i Bournemouth-it, por ai do të merret në konsideratë vetëm nëse operacioni për Barcola-n dështon.
Barcola u transferua te PSG nga Lyon në vitin 2023 për 45 milionë euro. Këtë sezon, ai ka zhvilluar 19 ndeshje, duke shënuar 5 gola dhe dhënë 3 asistime.
Kontrata e tij me kampionët e Francës zgjat deri në vitin 2028, ndërsa vlera e tij në treg sipas Transfermarkt llogaritet 70 milionë euro.
