Kryeministri i Maltës, Robert Abela, ka njoftuar se vendi i tij do ta njohë zyrtarisht shtetin e Palestinës muajin e ardhshëm.
Ky deklarim u bë gjatë një aktiviteti politik, ku Abela foli për çështje vendore dhe ndërkombëtare, duke vënë theksin te situata humanitare në Rripin e Gazës.
“Nuk mund të qëndrojmë indiferentë ndaj kësaj tragjedie njerëzore që po përkeqësohet dita-ditës,” u shpreh Abela.
Ai theksoi se njohja e Palestinës përfaqëson një detyrim moral dhe se kjo do të ndodhë pas një konference të planifikuar për më 20 qershor.
Kryeministri u trondit nga lajmi për vdekjen e nëntë fëmijëve të mjekes palestineze, Dr. Alaa Al-Najjar, gjatë një sulmi ajror izraelit në Khan Younis, ku u plagos rëndë edhe bashkëshorti i saj, ndërsa vetëm një nga fëmijët mbijetoi.
Malta, sipas Abela, është e gatshme të mirëpresë Dr. Al-Najjar dhe familjen e saj në vend.
