Teksa vendi është përfshirë prej më shumë se një muaji nga protesta kundër projektit të investimit turistik në zonën e Zvërnecit, kryeministri Edi Rama thotë se do të lexojë mesazhet që përcjell tubimi, duke bërë dallimin mes qytetarëve që protestojnë për problematika reale dhe atyre që, sipas tij, përdoren për qëllime politike. Në një bashkëbisedim me pensionistët, Rama u shpreh se në Bulevardin “Dëshmorët e Kombit”, ku dikur janë vrarë njerëz gjatë protestave, sot qytetarët protestojnë lirisht, ndërsa pretendoi se në tubim marrin pjesë edhe “mercenarë” nga Prishtina dhe Tetova, të cilët, sipas tij, paraqiten si përfaqësues të diasporës.
Rama: Në këtë bulevard janë vrarë njerëz me pushkët e shtetit për të protestuar. Sot është gjë shumë e madhe që është bërë bulevardi i Tiranës si karnavalet e Rio de Janeiros që i ndjek gjithë bota. Kjo tregon që ne kemi krijuar kushte t që në këtë vend të lulëzojë edhe liria dhe demokracia. Disa dalin atje, disa luajnë futboll, disa pinë kafe. Çohu nga kafja s’ka. Kush do të rrijë në kafe do rrijë në kafe, kush do të shkojë në punë do shkojë në punë, kush do të protestojë të protestojë. Protesta nuk është ajo që thuhet. Është edhe ajo që nuk thuhet, edhe për mirë dhe për keq. Protesta është ajo që nuk thuhet kur dalin atje shërbëtorë të paguar, mercenarë të ardhur nga Prishtina dhe nga Tetova dhe që bëjnë si diapsorë, por është dhe ajo që nuk thuhet. Shumë prej tyre nuk kanë dalë aty për të bërë rrëmuja, por kanë dalë se duan më shumë këtu, më mirë atje.
Këto janë të ndarë. Diktaturën dhe demokracinë kjo i dallon. Në diktaturë protestuesi është gjithmonë një kërcënim për interesa kombëtare dhe një armik që shfaqet dhe që duhetgoditur. Ka një kore të zezë mbi protestën. Merrini shikojini një nga një, nga dështaket politikë të dështakët e rrugëve të tjera të jetës se kujtojnë se tani u bë deti kos dhe do marrin në dorë fatet e vendit me dhunë ose me presion. Do e zgjedhin kryeministrin me short. Problemi është çfarë mendon populli dhe si mendon populli. Populli flet në zgjedhje. Protestës ne do t’i drejtohemi në mënyrë të strukturuar dhe do të duhet të bëjmë një reflektim serioz. Kjo nuk diskutohet.
