– I penduari i Drejtësisë Erjon Alibej ka treguar detaje nga vrasja e Dorian Shkozës që ka ndodhur në vitin 2020 në lagje n 14 në Durrës. Alibej para GJKKO-së ka treguar se Nuredin Dumanit i ka dhënë makinën që përdori dhe armën te pazari i Rrogozhinës, ndërkohë që theksoi se në momentin që i mori, Dumani ndodhej me Klevis Allën. Më tej ai ka shtuar se me një të njohurin e tij i ka çuar atij 150 mijë euro, për t’i treguar që kishte para.
“Ja dhashë makinën dhe armët te pazari i Rrogozhinës, ishte me Klevis Allën kur i mori. Më pas, Nuredini kërkoi dhe 50 mijë euro. Ia çova me një mikun tim. Ia dhashë gjithsej 150 mijë euro, që të shikonte që kisha lek dhe të kishte besim”, u shpreh ai.
Ndërsa për vrasjen e vëllezërve Haxhia, Alibej theksoi se armët ia dha Dumanit, që ishin një pistoletë dhe dy kallashnikovë. Sipas Alibejt, plani i parë ishte që të vrisnin vetë Altin Ndocin dhe Besmir Haxhinë, por viktimë ka ngelur dhe Viktor Haxhia.
“I thashë Nuredinit pse kishte shenja gjaku në makinë. Më tha: kemi qëlluar me xhama mbyll dhe nga ciflat është lënduar ‘Kusho’. Më pas u shoqërua ‘Nipi’ në polici dhe Nuredini më tha: ‘Më duket se ky po flet’. E mori vesh nga komshinjtë, nga ‘Miri Pojes’, që e kishte mik”, tha Alibej.
