Kryeministri Edi Rama, në rubrikën Sy m’sy’, i është përgjigjur komentit të një ndjekësi, i cili e quan tallje vendimin e qeverisë për uljen e çmimit të energjisë me 1 lekë për kilovat, për konsumatorët familjarë që shpenzojnë deri në 700 kWh/h në muaj.
“Moos se e ulët shumë korrentin. Çfarë bëni kështu? Talleni me njerëzit. E hanë sapunin për djathë”, ishte komenti nga një ndjekës në Facebook, të cilit Rama iu përgjigj duke i thënë se ulja e çmimit të energjisë ka ardhur si pasojë e reformave në sektor.
Ndër të tjera, ai solli edhe disa krahasime të çmimit të energjisë në vendin tonë me disa nga vendet e Bashkimit Europian.
“Krenar, shikoji pak çmimet për kilovat/h në Greqi dhe Europë. Shqipëria bie në 8.3 lekë, Greqia 22 lekë/kwh, Italia 33 lekë kwh, Gjermania 40 lekë kwh dhe më e ulëta nga të gjitha është Hungaria dhe prapë është rreth 20% më e lartë se te ne”, tha Rama.
Kreu i qeverisë iu përgjigj edhe një ndjekësi tjetër, i cili shkruante: “O medet sa po talleni me popullin shqiptar. 700 kwh janë pak”.
Rama tha se abonentët familjarë që konsumojnë deri në 700 kilovat në një muaj, janë më shumë se 1 milionë.
Rama: Krenari (komentuesi) shkruan nga Greqia dhe qan hallin e njerëzve që po i tallim.
Po i tallim se po ulim çmimin e energjisë dhe jo pak por 10.5% për kilovat. Ulet çmimi i energjisë si askund tjetër rrotull nesh falë investimeve të bëra masivisht këto vite, rezultateve të arritura nga në transformimit rrënjësor të sektorit që e mabni mend se çfarë mysybeti ishte.
Dhe natyrisht, edhe falë qasjes sonë gjithnjë të lidhur me zotimin për ti bërë njerëzit pjesë të arritjeve të reformave.
Dhe, prapë se prapë, fjala e keqe fluturon pa të keq deri në përqeshjen e popullit se ‘e haka sapunin për djathë’.
Unë jam i bindur se Krenari, jo vetëm se nuk e di sa më e shtrenjtë është energjia elektrike atje ku jeton ai në Greqi, por nga mënyra si flet bën pjesë te ata që thonë se Shqiëpria është vendi më i shtrenjtë i Europës.
Krenar, shikoji pak çmimet për kilovat/h në Greqi dhe Europë. Shqipëria bie në 8.3 lekë, Greqia 22 lekë/kwh, Italia 33 lekë/kwh, Gjermania 40 lekë/kë dhe më e ulëta nga të gjitha është Hungaria dhe prapë është rreth 20% më e lartë se te ne
Ndërsa Gëzimi (komentuesi) që thotë 700 kwh janë pak, i them se në kategorinë deri në 700 kwh hyjnë mbi 1 milionë konsumatorë familjarë dhe mbi këtë kategori janë më pak se 100 mijë konsumatorë familjarë, të cilët kanë shtëpi më të mëdha, të ardhura më të mëdha dhe kanë shpenzime më të mëdha të energjisë, ndaj do të paguajnë më shumë.
Dhe viza jonë nuk lëviz, kush fiton më shumë do të paguajë në shumë, kush paguan më pak do të paguajë më pak.
Kaq.
