Një 35-vjeçar shqiptar ka humbur jetën pas një aksidenti të rëndë në pyjet e Rasorës, në zonën e Bolonjës.
Viktima është Shkelzen Pali, i cili prej vitesh jetonte në Itali. Ai ndodhej në pyll së bashku me një koleg duke prerë pemë.
Reklamë
Gjatë punës, për transportimin e trungjeve ishte vendosur një teleferik i lëvizshëm. Sipas të dhënave paraprake, aksidenti ndodhi në momentin kur po aktivizohej kablloja e teleferikut.
Dyshohet se një pjesë e kabllos ishte krijuar si lak në tokë dhe Pali kishte futur këmbët brenda saj, pa e kuptuar. Kur mekanizmi u vu në lëvizje, kablloja e goditi rëndë 35-vjeçarin.
Kolegu i tij ndaloi menjëherë makinerinë dhe telefonoi për ndihmë. Në vendngjarje mbërritën ambulanca dhe zjarrfikësit, por 35-vjeçari kishte ndërruar jetë nga plagët e marra.
Për ngjarjen kanë nisur hetimet Karabinierët, të cilët po punojnë për të zbardhur rrethanat e plota të aksidentit dhe nëse janë respektuar masat e sigurisë.
