Janë zbuluar identitetet e dy personave që kryen grabitjen e armatosur në një karburant në Sukth, gjatë orëve të para të mëngjesit të sotëm. Ngjarja u pasua nga një ndjekje e ashpër përgjatë aksit Durrës–Tiranë.
Ilirianews.al mëson se personat e përfshirë në këtë ngjarje janë shtetasit Ardit Domi, 28 vjeç, dhe Lorenc Çali, 27 vjeç, të dy banues në fshatin Bilalas të Shijakut. Pas vjedhjes së një automjeti, dy të rinjtë e përdorën atë për të kryer një grabitje me dhunë në një pikë karburanti në Sukth.
Ata u përballën me Policinë në një ndjekje të tensionuar që zgjati rreth 25 minuta dhe përfundoi rreth orës 01:00 në rrugën dytësore që të çon drejt Shijakut, ku automjeti me të cilin udhëtonin doli nga rruga. Gjatë përplasjes me armë, Ardit Domi mbeti i plagosur dhe u transportua në Spitalin e Traumës në Tiranë, ku ndodhet jashtë rrezikut për jetën.
Ndërkohë, Lorenc Çali u neutralizua dhe u arrestua në vendin e ngjarjes. Në vendngjarje u sekuestrua një armë zjarri automatike tip kallashnikov me dy krehra fishekësh, e përdorur nga autorët gjatë rezistencës ndaj forcave të rendit. Nën drejtimin e Prokurorisë së Durrësit, hetimet vijojnë për zbardhjen e plotë të rrethanave të ngjarjes dhe identifikimin e çdo personi tjetër që mund të ketë qenë i përfshirë apo bashkëpunëtor.
