Elbasani ka nisur sot festimet për Ditën e Verës, duke shndërruar qytetin në një skenë të gjallë plot muzikë, ngjyra dhe atmosferë festive.
Si çdo vit, Elbasani mirëpret mijëra vizitorë nga e gjithë Shqipëria, të cilët bashkohen për të festuar ardhjen e pranverës dhe për të nderuar traditën dhe kulturën.
Festimet u hapën me aktivitetin “Trashëgimia në duart e vogla”, ku fëmijët e kopshteve të qytetit shfaqën talentet e tyre përmes lojërave tradicionale, punimeve artizanale dhe këngëve festive.
Një javë plot festa dhe surpriza
Mbrëmjen e 12 Marsit, do të rikthehet defileja e Kostumeve Tradicionale, një paradë që do të sjellë në skenë kulturën dhe folklorin e trevave shqiptare.
Në 13 Mars, festa do të arrijë kulmin me atmosferën e zjarrtë të Natës së Verës, ku koncertet dhe performancat artistike do të zgjasin deri në orët e para të mëngjesit.
Më 14 Mars, festivitetet do të vijojnë me një program të pasur aktivitete, që do të kulmojë me një koncert të madh në mbrëmje. Festimet do të vazhdojnë edhe më 15 dhe 16 Mars me aktivitete për fëmijë, panaire tradicionale dhe ngjarje kulturore.
