Policia e Elbasanit ka ndëshkuar reperin e njohur Arkimed Lushaj, i njohur si Stresi, për manovrat e rrezikshme që ai kreu me automjetin e tij në aksin rrugor “Elbasan-Bradashesh”. Ngjarja u bë publike pasi vetë reperi ndau një video në rrjetet sociale, ku shihej teksa ecte kundravajtje, shmangte kolonën e trafikut dhe përdorte dritat verbuese në një zonë të banuar.
Sipas njoftimit të Policisë Rrugore, ndaj Stresit është vendosur një masë administrative prej 25,000 lekësh të reja, dhe i janë zbritur 10 pikë nga leja e drejtimit. Shkeljet e tij janë evidentuar si në kundërshtim me disa nene të Kodit Rrugor, përfshirë përdorimin e dritave verbuese dhe lëvizjen në sens të kundërt.
Deklarata e Policisë
“Pas publikimit të një videoje në rrjetet sociale, ku drejtuesi i automjetit, shtetasi A. L., shfaqet duke parakaluar një varg automjetesh në sensin e kundërt të lëvizjes, duke përdorur dritat verbuese në zonë të banuar, në aksin ‘Elbasan-Bradashesh’, ju informojmë se Sektori i Policisë Rrugore ka ndëshkuar shtetasin me masën administrative 25,000 lekë, bazuar në dispozitat e Kodit Rrugor. Gjithashtu, janë zbritur 10 pikë nga leja e drejtimit.”
Policia e Elbasanit u ka bërë thirrje qytetarëve që të denoncojnë çdo shkelje të rregullave të qarkullimit rrugor, duke garantuar reagim të menjëhershëm dhe konform ligjit.
Ky veprim i Stresit ka ngritur sërish shqetësime për sigurinë rrugore dhe nevojën për zbatimin rigoroz të rregullave të qarkullimit në Shqipëri.
