Një motor është gjetur i djegur pasditen e sotme në fshatin Vukatane të Shkodrës. Policia dyshon se mjeti i gjetur i djegur është përdorur në vrasjen e 34-vjeçarit Kristian Kola.
Zyrtarish policia e Shkodrës nuk ka dhënë detaje për motorin e gjetur.
Ekzekutimi mafioz i 34-vjeçarit Kristian Kola, mbrëmjen e së enjtes, 4 shtator, në Shkodër, vijon të mbetet pa autor dhe pa motiv. Ngjarja ndodhi në qendër të qytetit, përballë dhjetëra dëshmitarëve dhe nën objektivin e kamerave të bizneseve private.
Pavarësisht kësaj, autorët arritën të largohen me motorin që përdorën për atentatin. Në momentin e vrasjes, viktima ishte ulur në një lokal buzë rrugës, së bashku me një person tjetër.
Autorët e maskuar qëlluan drejt tij, ndërsa i riu tentoi të largohej, por nuk ia doli të shpëtonte. Pas krimit, ekzekutorët u larguan me motorin që i priste pak metra më tej. Policia ka sekuestruar pamjet filmike, ku duket qartë mjeti dhe dy personat e dyshuar, por ende nuk ka ngritur një pistë të qartë hetimi.
Sipas burimeve, Kola nuk ka pasur precedentë penalë. Ai drejtonte një firmë ndërtimi bashkë me të atin, ndërsa kohët e fundit kishin marrë punime në kinemanë e qytetit.
Nuk rezulton të ketë pasur lidhje me grupet kriminale të Shkodrës, por hetuesit po kontrollojnë të gjitha lëvizjet e tij të fundit. Grupi hetimor ka marrë dëshmitë e para dhe po analizon dhjetëra orë filmime sigurie.
Dyshohet se i riu ishte ndjekur për disa ditë para se të ekzekutohej. Gjithashtu, policia po verifikon kontaktet dhe komunikimet e fundit të tij, për të zbuluar nëse Kola ka qenë në konflikt me ndokënd.
Dëshmitë e familjarëve, sidomos të atit, pritet të jenë kyçe për hetimin. Në fokus janë edhe shokët e viktimës, ndërsa policia dhe prokuroria thonë se duhen ditë të tëra për të analizuar materialet e mbledhura.
Ngjarja ka tronditur sërish qytetin e Shkodrës, vetëm pak ditë pas një tjetër vrasjeje të rëndë, ku një person ekzekutoi kushëririn e tij, duke pretenduar se ishte vetëmbrojtje.
