Ekonomia e Shqipërisë e ka nisur vitin 2025 me një rritje prej 3.39%, sipas të dhënave nga Instituti i Statistikave për tremujorin e parë, duke shënuar një ngadalësim krahasuar me tremujorin e parë të vitit që lamë pas.
Kontributin më të madh në Produktin e Brendshëm Bruto e ka dhënë “administrata publike, arsimi, shëndetësia”, duke sjellë 66% të vlerës së shtuar në ekonomi.
Për administratën publike, arsimin dhe shëndetësinë, pagat dhe kontributet sociale të punonjësve zënë pjesën kryesore të kontributit në Prodhimin e Brendshëm Bruto. Elementë të tjerë janë shpenzimet për mallra dhe shërbime.
Në fund të tremujorit të parë 2025, paga mesatare bruto në administratën publike ishte 98.5 mijë lekë, me një rritje prej rreth 17% me bazë vjetore. Ndikim pozitiv në rritjen ekonomike ka pasur edhe tregtia, akomodimi e shërbimi ushqimor.
Në të njëjtën ecuri ka vijuar edhe ndërtimi, si dhe aktivitetet e pasurive të paluajtshme. Por bujqësia, industria dhe informacioni vijojnë të ndikojnë negativisht në rritjen ekonomike të vendit. Industria prej 6 tremujorëve është në territori negativ, ku në tre muajt e parë të këtij viti kontribuoi me minus 0.66 pikë përqindje.
Kontribut negativ dha në këtë tremujor edhe informacioni, me minus 0.07 pikë përqindje. E njëjta tendencë është edhe për bujqësinë, me një kontribut negativ me minus 0.46 pikë përqindje. Ndërsa ndalur tek Konsumi final i popullatës, ky tregues është rritur me 4% këtë fillimvit, çka tregon rritjen e kërkesave, por dhe shpenzimeve nga individët.
