Pas vendimit të Apelit të Gjykatës së Posaçme, që e dënoi përfundimisht ish-kryebashkiakun e Durrësit Vangjush Dako me 2 vite e 8 muaj burgim për shpërdorim detyre, ai është larguar nga spitali për t’u kthyer në qelinë e burgut të Durrësit.
Dako kishte qëndruar disa ditë në spital për arsye shëndetësore, por pas përmirësimit të gjendjes së tij, Policia e shoqëroi atë në burg.
Sipas burimeve, ai do të qëndrojë në qeli vetëm 6 ditë, pasi dënimi i tij mbaron më 27 shtator, dhe pjesën më të madhe të dënimit e ka vuajtur nën masën e sigurisë “arrest në shtëpi”.
Vangjush Dako u akuzua nga SPAK për shpërdorim detyre në dy raste. I pari ka të bëjë me miratimin e lejes së ndërtimit për një kompani, ku Dako dhe vartësit e tij kanë përpiluar dokumentet dy vjet pas përfundimit të ndërtimit dhe pas hyrjes së banorëve në apartamente. Episodi i dytë lidhet me një procedurë prokurimi për shërbim konsulence në lidhje me një projekt për “Promenadën Bregdetare dhe Plazhin publik nga Bërryli deri në Currila”, ku komisioni i ngritur nga Dako ka bërë gabim në llogaritjen e fondit limit, duke e shpallur atë gati 10 herë më të madh se sa vlera e caktuar nga Këshilli i Ministrave.
