Trajneri i Shqipërisë, Silvinjo, publikoi këtë të hënë listën e lojtarëve që do të jenë të grumbulluar për dy ndeshjet kualifikuese në muajin qershor, ndaj Serbisë dhe Letonisë.
Tekniku kuqezi deklaroi se Kombëtarja shqiptare ka lojtarë nga të gjitha anët e botës.
Sipas tij, është edhe një lojtar shqiptar që luan në Argjentinë.
Ndër të tjera, Silvinjo tha se një repart i vetëm nuk mund ta fitojë ndeshjen, por duhet skuadra e bashkuar.
“Ne do përgatisim lojtarët për të luajtur futboll për 90 minuta, kështu mund të bëhet diferenca. Kemi lojtarë nga të gjitha anët e botës. Për momentin kemi një lojtar shqiptar në Argjentinë. Futbolli nuk bëhet vetëm 24 orë. Kur një lojtar luan mirë për momentin, jo domosdoshmërish mund të ftohet. Unë besoj te një ekip ku ke një bazë ku rritet dhe mund të shtojmë 3-4 elementë.
Të gjitha pjesët janë të rëndësishme. Nuk ka një repart që të fiton ndeshjen. Janë 11 lojtarë që kontribuojnë për të fituar ndeshjen. Nuk mendoj se zgjedhja ideale është të luash me 4 sulmues dhe 6 mbrojtës, por të kemi një ekuilibër”, u shpreh Silvinjo.
