Detaje të reja dalin nga vrasja e 44-vjeçarit Francesk Shkambi, mbrëmjen e së dielës (16 Nëntor) jashtë restorantit Prime 7, ku punonte si menaxher, në Commerce Township.
Viktima, i njohur si Franco, u gjet i shtrirë jashtë restorantit me plagë të shkaktuara nga arma e zjarrit në trup.
Pronari i “Prime 7”, Frank Gjuraj, kunati i 44-vjeçarit, u shpreh se viktimën e thirri një burrë jashtë për të folur dhe e qëlloi me armë. Franco i dërgua në spital, por nuk arriti që t’i mbijetonte plagëve.
“Nuk mund ta besoj që ndodhi kjo. Pse? Si? Për çfarë?”, tha Gjuraj.
Kur e njoftuan për të shtënat me armë, ai mendoi se ishte një shaka.
Sipas policisë, i dyshuari, 65-vjeçari Tonin Pjetri, u dorëzua rreth 20 minuta pas krimit.
Detektivët gjetën gjithashtu pistoletën, e cila ishte raportuar e vjedhur.
“Ata e njihnin njëri-tjetrin për një periudhë kohore, gjithçka u përshkallëzua në një mosmarrëveshje dhe i dyshuari qëlloi viktimën”, tha sherifi Michael Bouchard.
