Një ngjarje e rëndë ka ndodhur paraditen e djeshme në Malishevë ku 4 gjimnaziste kanë dhunuar fizikisht një moshatare të tyre.
Lajmi i rëndë u mësua menjëherë pasi në rrjet qarkulluan gjerësisht pamjet e momentit kur gjimnazistet dhunojnë një moshatare të tyre.
Sipas mediave vendase raportohet se vajzat janë nxënëse të klasës së dhjetë të gjimnazit “Hamdi Berisha” në Malishevë.
Referuar pamjeve të publikuara nga gazeta Demos mësohet se video në fjalë është filmuar e gjitha nga njëra prej vajzave që ka qenë pjesë e grupit të adoleshenteve që dhunuan moshataren e tyre.
“Shoqe oj shoqe. Më thuaj 3 herë “Më fal”. Thuj unë kurrë nuk ha *** për ty. Vetëm edhe njëherë të ta dëgjoj zërin unë zhag do të të çoj lart” dëgjohet njëra prej vajzave duke i thënë adoleshentes së dhunuar.
Po ashtu, pamjet filmike tregojnë momentin kur vajzat bëhen bashkë dhe godasin me grushte, pastaj gjuajnë me shkelma dhe i shkulin flokët moshatares së tyre.
Ndërsa pas dhunës fizike, ato e kërcënojnë që vajza të mos i tregojë asnjërit për ngjarjen e ndodhur.
Në lidhje me këtë situata të rëndë ka reaguar dhe Policia e Malishevës, e cila ka bërë me dije se deri më tani 2 nga katër vajzat janë identifikuar dhe pritet të intervistohen .
Blutë e Kosovës po vijojnë me punën për zbardhjen e plotë të rastit të rëndë. Ndërsa, deri më tani mbetet e paqartë arsyeja apo vendi se ku ka ndodhur ngjarja.
“Nuk dihet saktësisht se kur ka ndodhur rasti, por pamjet janë publikuar ditën e djeshme. Janë identifikuar dy nga katër të dyshuarat dhe nesër pritet që ato të intervistohen. Ky rast mbetet në shënim zyrtar, derisa ende nuk dihet se si do të vazhdohet me rastin”, ka deklaruar Policia për KlanKosova.Tv
