Një turist i huaj ka humbur jetën dhe një tjetër është gjetur në situatë kritike nga Policia Kufitare, gjatë një patrullimi rastësor në ujërat detare shqiptare ditën e sotme.
Policia Kufitare bëri me dije se ka transportuar dy shtetas të huaj, nga të cilët një ka humbur jetën, i seksit mashkull dhe personi tjetër u mor nga ambulanca në gjendje shoku.
Personat nuk kishin mjete identifikuese, teksa kanë nisur hetimet për zbardhjen e plotë të ngjarjes. Sipas informacioneve nga porti, rezulton se teksa patrullonte në det, një skaf i kufirit ka hasur një motor uji me dy persona sipër.
Mjetit i ishte fikur motori dhe besohet se dy personat kanë vuajtur hipoterminë e mundshme në det të hapur. Nuk dihet se për sa orë kanë qëndruar në det të hapur dy personat, për të cilët po punohet edhe për identifikimin.
Skafi i kufirit ka bërë transportimin e tyre në port te kalata zero. Ndërkohë teksa mbërriti autoambulanca, fatkeqësisht njëri prej tyre ndërroi jetë, ndërsa tjetri u dërgua në spital në gjendje të rëndë.
Për rastin është ngritur edhe grupi hetimor, teksa priten rezyultatet e ekspertimit mjeko-ligjor dhe dëshmitë nga i mbijetuari.
