ATHINË – Një vrasje mafioze ka tronditur pasditen e së enjtes zonën e Halandrit në Athinë, ku u ekzekutua në mënyrë barbare Jorgo Moschouris, një prej figurave të njohura të botës së krimit në Greqi dhe i identifikuar nga autoritetet si pjesë e së ashtuquajturës “Greek Mafia”.
Moschouris, i njohur në rrethet e krimit me nofkën “Thamnakias”, sapo kishte dalë nga një qendër diagnostike analizash kur u qëllua për vdekje nga persona ende të paidentifikuar.
Autorët, që udhëtonin me makinë, iu afruan dhe e qëlluan me breshëri kallashnikovi, duke e lënë të vdekur në vend. Shumë prej plumbave e goditën në fytyrë, çka i shkaktoi vdekjen e menjëhershme.
Në vendin e ngjarjes u gjetën dhjetëra gëzhoja, ndërsa pak më vonë u zbulua një automjet i djegur në zonën Pátima të Halandrit, që dyshohet të ketë qenë makina e autorëve.
Policia greke po heton vrasjen si pjesë të një hakmarrjeje të mundshme brenda qarqeve të krimit të organizuar. Viktima kishte mbijetuar nga një tjetër atentat në vitin 2020 në zonën e Vulas, jashtë një pastiçerie të njohur.
Zona ku ndodhi vrasja është ende e rrethuar nga forcat e rendit, ndërsa hetimet janë në zhvillim. Policia ka sekuestruar pamjet e kamerave të sigurisë dhe po merr dëshmi nga dëshmitarët okularë për të rindërtuar itinerarin e autorëve.
