Në fjalimin e tij të parë si President i 47-të i SHBA-së Donald Trump sulmoi administratën e Biden dhe mënyrën se si kjo administratë trajtoi krizën e emigrantëve.
Trump tha se sfidat e vendit do të “asgjësohen”, duke shtuar se SHBA po përballet me krizën e “besimit ndaj një institucioni radikal dhe të korruptuar”.
Administrata e mëparshme, tha ai, siguroi strehë dhe mbrojtje për “kriminelët e rrezikshëm” që kanë hyrë ilegalisht në SHBA.
Më tej, duke vijuar fjalimin, Trump u ndal te zjarret shkatërruese që përfshinë Los Angelesin dhe uraganin në Karolinën e Veriut.
Ai tha se zjarret prekën disa nga më të pasurit dhe më të fuqishmit, disa prej të cilëve ishin të pranishëm në ceremoninë e betimit.
“Ata nuk kanë më shtëpi. Kjo është interesante,” tha ai.
Ai tha se SHBA-ja ka një sistem shëndetësor që nuk jep rezultate në kohë katastrofash, por thotë se për të shpenzohen më shumë para “se kudo në botë”.
Ai shton se vendi ka një sistem arsimor që “i mëson fëmijët tanë të kenë turp nga vetja”.
“E gjithë kjo do të ndryshojë, duke filluar nga sot, dhe do të ndryshojë shumë shpejt”, tha Trump.
“Rënia e Amerikës ka përfunduar”
Presidenti i sapo betuar tha se atij iu dha një mandat për të “përmbysur plotësisht” atë që ai e quan “një tradhti të tmerrshme” nga personat në pushtet kundër popullit amerikan, duke shtuar se ai do t’u japë njerëzve “besimin e tyre, pasurinë e tyre, demokracinë dhe lirinë e tyre”.
“Që nga ky moment, rënia e Amerikës ka përfunduar,” tha ai.
Trump: Jeta ime u shpëtua ‘për një arsye’
Më tej, Trump u ndal te atentati kundër tij gjatë fushatës zgjedhore.
Duke reflektuar mbi atentatin ndaj tij, ai thotë se gjatë tetë viteve të fundit është “testuar më shumë se çdo president”.
Ai shton se disa janë përpjekur t’i marrin lirinë e tij “dhe jetën”.
Trump thekson se jeta e tij u shpëtua “për një arsye” – për ta “bërë Amerikën përsëri të madhe” – slogani i tij për dy cikle fushatash.
Presidenti projekton një imazh të ‘fuqisë dhe forcës’
Trump thotë se qeveria e tij do të punojë për të përballuar çdo krizë me “dinjitet, fuqi dhe forcë” dhe “do të sjellë përsëri prosperitet për qytetarët e çdo race, feje, ngjyre dhe besimi”.
“20 janari 2025 është dita e çlirimit”, thotë ai, deklaratë e cila u shoqërua me një duartrokitje.
“Shpresoj që zgjedhjet e fundit të mbahen mend si më të mëdhatë dhe më të rëndësishmet në historinë e vendit tonë”, tha Trump.
Emergjenca kombëtare në kufirin jugor do të nënshkruhet sot
Trump në fjalimin e tij detajoi disa nga veprimet ekzekutive që planifikon të ndërmarrë tani që është president.
Sot, thotë ai, do të nënshkruajë një urdhër ekzekutiv që shpall një emergjencë kombëtare në kufirin SHBA-Meksikë.
Të gjitha hyrjet e paligjshme do të “ndalohen menjëherë”, thotë ai, duke shtuar se qeveria do të fillojë procesin e kthimit të miliona “të huajve kriminelë” nga kanë ardhur.
Kartelet do të cilësohen si organizata të huaja terroriste, thotë Trump
Trump thotë se urdhrat e sotëm ekzekutiv do të jenë “përcaktimi i karteleve si organizata të huaja terroriste”..
Ai thotë se duke thirrur “Aktin e armiqve të huaj të vitit 1798” ai do ta drejtojë qeverinë të përdorë “fuqinë e plotë dhe të pamasë të zbatimit të ligjit federal dhe shtetëror” për t’i dhënë fund “bandave të huaja në tokën amerikane”.
Trajtimi i inflacionit
Presidenti e drejtoi vëmendjen e tij në trajtimin e inflacionit dhe rritjen e kostove të energjisë për amerikanët, një pikë qendrore e fushatës së tij.
Ai thotë se do t’i drejtojë të gjithë anëtarët e kabinetit të bëjnë atë që është në fuqinë e tyre për të “mposhtur” inflacionin dhe “të ulin me shpejtësi kostot dhe çmimet”.
Trump shton se ai do të shpallë një emergjencë kombëtare të energjisë dhe përsërit premtimin e tij se administrata e tij do të rrisë shpimin e naftës dhe gazit në tokën amerikane.
“Amerika do të jetë një komb prodhues edhe një herë,” thotë ai, duke shtuar se Amerika ka “më shumë naftë dhe gaz natyror nga çdo komb në tokë, dhe ne do ta përdorim atë.”
Presidenti premton ta bëjë Amerikën një ‘komb të pasur përsëri’
Ai thotë se SHBA do të jetë një “komb i pasur përsëri” për shkak të “arit të lëngshëm nën këmbët tona”.
Ai detajon planet e tij për industrinë e automobilave, duke thënë se do të revokojë një “mandat të automjeteve elektrike” dhe do të ndërtojë automobila në Amerikë “përsëri me një ritëm që askush nuk mund ta kishte ëndërruar të mundur vetëm disa vjet më parë”.
“Ëndrra amerikane do të kthehet së shpejti”
Trump thotë se do të fillojë menjëherë një rregullim të tregtisë dhe se po themelon “Shërbimin e të Ardhurave të Jashtme” për të mbledhur të gjitha tarifat dhe të ardhurat.
Ai thotë se këto të ardhura do të vijnë nga “burime të huaja”.
“Ëndrra amerikane së shpejti do të kthehet dhe do të lulëzojë si kurrë më parë”, thotë presidenti.
Ai flet për themelimin e DOGE, departamenti i ri i efikasitetit të qeverisë.
“Pas vitesh e vitesh kufizimi të paligjshëm dhe antikushtetues të shprehjes, unë do të nënshkruaj gjithashtu një Urdhër Ekzekutiv për të ndaluar çdo censurë dhe për të rikthyer fjalën e lirë në Amerikë”, thotë ai.
Presidenti feston marrëveshjen historike të armëpushimit Izrael-Hamas
Trump foli gjithashtu për marrëveshjen e armëpushimit mes Hamasit dhe Izraelit.
Në Lindjen e Mesme, Trump tha se do të jetë një “paqebërës dhe bashkues” dhe foli për tre pengjet izraelitë që ishin mbajtur nga Hamasi në Gaza dhe u kthyen te familjet e tyre dje.
“Amerika do të rimarrë vendin që i takon si kombi më i madh, më i fuqishëm, më i respektuar në tokë, duke frymëzuar frikën dhe admirimin nga e gjithë bota”, thotë ai.
Ai thotë se së shpejti do të ndryshojnë emrin e Gjirit të Meksikës në “Gjiri i Amerikës”.
“E ardhmja është e jona”, thotë Trump ndërsa përfundon fjalimin e tij
Trump e pranon rikthimin e tij politik dhe thotë se “populli amerikan ka folur”.
“Unë qëndroj para jush si provë që nuk duhet të besoni kurrë se diçka është e pamundur për të bërë. Në Amerikë, të bësh të pamundurën është ajo që ne bëjmë më mirë,” tha Trump.
Ai përfundon duke thënë se Amerika nuk do të pushtohet apo frikësohet
“Ne nuk do të dështojmë. Që nga kjo ditë, Shtetet e Bashkuara të Amerikës do të jenë një komb i lirë, sovran dhe i pavarur,” thotë ai.
“E ardhmja është e jona dhe epoka jonë e artë sapo ka filluar.”
