E ardhmja e Marcus Rashford te Barcelona është ende e pasigurt, edhe pse sulmuesi anglez dëshiron të vazhdojë aventurën me katalanasit.
Pas fitores në El Clasico ndaj Real Madrid, ku Rashford shënoi një gol të bukur nga goditja e lirë, ai u pyet për të ardhmen e tij. Përgjigjja ishte e qartë, por edhe e paqartë njëkohësisht: “Nuk e di, nuk jam magjistar. Nëse do të isha, do të qëndroja. Do të shohim.”
Sipas BBC, Rashford dëshiron të qëndrojë te Barcelona dhe kjo marrëveshje do të kishte kuptim për të gjitha palët. Megjithatë, negociatat pritet të jenë të vështira.
Rashford është ende lojtar i Manchester United dhe ka kontratë deri më 30 qershor 2028. Marrëveshja e huazimit me Barcelona përfshin një opsion blerjeje prej 30 milionë eurosh, që mund të aktivizohet deri më 15 qershor.
Problemi është se Barcelona nuk duket e gatshme ta aktivizojë menjëherë këtë klauzolë. Klubi katalanas po kërkon të negociojë sërish, madje mund të tentojë një tjetër huazim për sezonin e ardhshëm. Nga ana tjetër, Manchester United nuk është i gatshëm të pranojë një formulë të tillë, pasi beson se mund të fitojë më shumë nga klube të tjera.
Rashford ka bërë një sezon pozitiv me Barcelona, duke regjistruar 14 gola dhe 14 asistime në 47 ndeshje. Forma e tij i ka siguruar edhe rikthimin në kombëtaren angleze, ndërsa pritet të jetë pjesë e listës përfundimtare për Botërorin.
Sulmuesi ndihet mirë te Barcelona dhe e ka bërë të qartë se nuk dëshiron që kjo aventurë të përfundojë. Ai e ka cilësuar klubin “special” dhe ka thënë se katalanasit do të fitojnë shumë në të ardhmen.
Megjithatë, vendimi përfundimtar do të varet nga negociatat mes Barcelona dhe Manchester United. Afati i 15 qershorit mund të sjellë një përgjigje, por nuk përjashtohet që bisedimet të vazhdojnë edhe më vonë gjatë merkatos.
