Vijon misteri me personin e tretë që dyshohet se ishte i pranishëm në makinë me dy viktimat Hamza Lici dhe Arlind Bushatin.
Një person i veshur me të zeza, i cili është parë pranë trupit të pajetë të Hamza Licit me duart me gjak, dyshohet se është pikërisht personi që ka qenë në makina, kur automjeti i Hamza Licit dhe Arlind Bushatit u qëllua me breshëri plubash.
Nuk dihet ende se kush është personi në fjalë, teksa burime për media bëjnë me dije se policia po punon për identifikimin e personit në fjalë.
Atentati me armë zjarri që tronditi dje Shkodrën dhe mbarë opinionin publik, po hetohet intensivisht nga Policia kriminale.
Fatkeqësisht kjo ngjarje pati pasoja të rënda me 3 viktima, ku mbetën të vdekur Hamza Lici, Arlind Bushati dhe një kalimtare e rastit, Flutura Basha. Ende nuk janë identifikuar autorët të cilët kanë djegur dhe automjetin me të cilin kryen atentatin, por policia dyshon se kanë qenë dy ekzekutorë me kallashnikovë dhe një i tretë që drejtonte makinën e tyre.
Duhet theksuar se prania e një personi të tretë ende nuk është e konfirmuar zyrtarisht nga uniformat blu. Mbetet të shihet dhe pritet një përfundim zyrtar nga ana e Policisë së Shtetit për të mësuar më shumë rreth kësaj ngjarje që ka tronditur mbarë Shqipërinë.
