Autori i dyshuar i vrasjes së 24-vjeçares palestineze në Tiranë, i cili rezultoi të jetë babai i saj, vazhdon të jetë në arrati. Sipas medias holandeze “De Telegraaf”, 49-vjeçari Fadi Alwan ka përdhunuar vajzën e tij, Rayyan Alwan, dhe më pas e ka vrarë. Po ashtu, dyshohet se ai mund të jetë fshehur në Amsterdam, kryeqytetin hollandez.
Fillimisht u tha se Fadi Alwan ishte bashkëshorti i viktimës, por autoritetet kanë konfirmuar tani se ai është babai i 24-vjeçares. Arsyet që çuan 49-vjeçarin të kryente këtë vepër të rëndë mbeten të paqarta, ndërkohë që pritet ekspertiza mjeko-ligjore për të zbuluar shkakun e vdekjes së vajzës.
Trupi i pajetë i Rayyan Alwan u gjet disa ditë më parë në një apartament të marrë me qira në rrugën e Kavajës, ku ajo po jetonte me babain e saj. Sipas informacioneve, dy shtetasit palestinezë jetonin në Gjermani dhe kishin udhëtuar në Shqipëri më 19 shkurt, duke kaluar nga Gjermania në Rinas. Në momentin e kalimit në kontrollin e pasaportës në aeroport, ata paraqitën dokumente greke. Pas daljes nga aeroporti, ata rezervuan një taksi që i dërgoi në apartamentin ku u realizua vrasja.
Policia ka shqyrtuar kamerat e sigurisë në zonë dhe ka zbuluar se më 22 shkurt, 49-vjeçari shihet duke u larguar nga zona e rrugës së Kavajës. Po në të njëjtën ditë, ai është larguar nga aeroporti i Rinasit. Grupi hetimor ka dyshime se krimi ndodhi më 22 shkurt. Hetimet vazhdojnë për zbardhjen e plotë të ngjarjes dhe për identifikimin e shkakut të vrasjes, ndërkohë që hetimi ka marrë një drejtim të ri.
