Një incident shqetësues është regjistruar mbrëmjen e sotme në hyrje të qytetit të Shkodrës, ku forcat e ndërhyrjes së shpejtë “Shqiponja” janë përballur me kërcënime serioze nga dy shtetas.
Sipas raportimeve në media, ngjarja ka ndodhur pranë një postoblloku policor, kur dy persona iu afruan efektivëve dhe i kërcënuan me fjalët: “Do t’ju hapim barkun me plumba”. Menjëherë pas këtij akti, të dy tentuan të largoheshin nga vendngjarja, por u kapën dhe ndaluan nga policia.
Të dy personat janë shoqëruar në komisariat për marrje në pyetje. Burime bëjnë me dije se njëri prej tyre është punonjës i Forcave të Ndërhyrjes së Shpejtë (FNSH), i cili në momentin e ngjarjes ndodhej jashtë shërbimi.
Motivet që çuan në këtë veprim të pazakontë mbeten ende të paqarta, ndërkohë që Policia e Shtetit vijon punën për të zbardhur plotësisht rrethanat e ngjarjes.
