Zbardhen detaje rrëqethëse nga aksidenti i rëndë në Sarandë ku humbën jetën dy motra, Elvisa Dhimaku 22 vjeçe dhe Rozina Dhimaku 20 vjeçe. Të dyja vajzat ishin nisur nga fshati Kopaçëz i Delvinës drejt spitalit të Sarandës, për të qëndruar pranë vëllait të tyre 10-vjeçar, i cili është diagnostikuar me leuçemi dhe ndodhej i shtruar për mjekim.
Motra e madhe, Elvisa, ishte në timonin e mjetit tip Lancia, ndërsa me to udhëtonte edhe shoqja e tyre, Antonela Zhupa, 24 vjeçe, e cila mbeti e plagosur. Ato nuk arritën kurrë të mbërrinin pranë djalit të vogël, pasi u përplasën kokë më kokë me një automjet tip Audi Q5, të drejtuar nga Kevi Norra, 23 vjeç.
Nga hetimet paraprake rezulton se Norra po kthehej nga Saranda drejt fshatit të tij, Fushëbardhë në Gjirokastër, kur në një zonë me vija të pandërprera kreu një parakalim të gabuar dhe doli kundravajtje. Përplasja frontale ishte fatale, duke shkatërruar pothuajse tërësisht mjetin e vajzave.
Policia e konstatoi shoferin në gjendje të dehur, me një nivel alkooli 1.52 mg/l në testin e parë dhe 1.42 mg/l në të dytin.
