Një turist banues në Gjermani është bërë shkaktari i aksidentit me pasojë plagosjen e një pushueseje në plazhin e lagjes nr. 13 në qytetin e Durrësit, teksa humbi kontrollin e mjetit lundrues Jet Ski.
Specialistët për Hetimin e Krimeve të Stacionit të Policisë Plazh konfirmuan ngjarjen dhe bënë me dije se e morën nën hetim 22-vjeçarin, bashkë me pronarin e mjetit. Kurse e plagosur mbeti një 61-vjeçare, por me lëndime të lehta dhe pa rrezik jete.
“U referuan materialet në Prokurori ku nisi procedimi penal për A. T., 48 vjeç, banues në Durrës dhe për shtetasin gjerman A. N., 22 vjeç, pasi në plazhin e lagjes nr. 13, shtetasi duke drejtuar pa leje drejtimi, mjetin lundrues Jet Ski në pronësi të shtetasit A. T., dyshohet se ka humbur kontrollin dhe aksidentalisht ka dëmtuar lehtë shtetasen S. O., 61 vjeçe, pushuese”, tha policia vendore.
Pas veprimeve paraprake të kryera në vendngjarje nga shërbimet policore, materialet e dosjes hetimore i kaluan prokurorisë vendore, për veprime të mëtejshme proceduriale.
