Legjenda e Manchester United, Rio Ferdinand, ka rrëfyer se po përballet me probleme serioze me shpinën edhe vite pas tërheqjes nga futbolli. Në një intervistë për Mirror, ish-mbrojtësi 47-vjeçar i Anglisë tha se dhimbjet janë aq të forta sa në disa momente detyrohet të qëndrojë në spital ose të përdorë karrocë invalidi.
“Shpina më ka dhembur prej shumë kohësh. Kam dëmtime që nga koha kur luaja… Për gjashtë vite merrja ilaçe dhe bëja injeksione vetëm që të luaja. Tani më ka ‘zënë’. Ka raste kur dhimbja është kaq e fortë sa duhet të kaloj disa ditë në spital ose në karrocë invalidi. Është e çmendur, sepse dhimbja vjen nga hiçi,” pranoi Ferdinand.
Ai tregoi gjithashtu se ka nisur trajtim me fizioterapist dhe po ndjek një qasje më “holistike” ndaj shëndetit, duke bashkëpunuar edhe me trajner personal. Ferdinand tha se tani e kupton sa e rëndësishme është parandalimi i dëmtimeve, por shtoi me humor se iu deshën 47 vite që ta kuptonte plotësisht.
Rio Ferdinand konsiderohet një ikonë e Manchester United, ku kaloi mbi 12 vite, me 455 paraqitje në total, 8 gola dhe 9 asistime. Ai u tërhoq nga futbolli në korrik 2015 dhe që atëherë punon si analist televiziv.
