Lionel Messi ka pranuar publikisht se ëndërron të luajë edhe në Kampionatin Botëror 2026, që do të zhvillohet në SHBA, Kanada dhe Meksikë. Pas triumfit historik me Argjentinën në Katar 2022, shumëkush mendoi se ai do ta mbyllte karrierën ndërkombëtare, por duket se kampioni i botës ka ndërruar mendje.
“Të luash në një Botëror është diçka e veçantë, dhe unë do të doja shumë të isha aty. Dua të jem në formën më të mirë dhe të ndihmoj kombëtaren time. Do të shoh nëse do jem 100% gati dhe i dobishëm për ekipin — pastaj do të marr vendimin,” – u shpreh Messi.
Në shtator, ai kishte njoftuar se kishte luajtur ndeshjen e fundit në shtëpi me Argjentinën, pasi shënoi dy gola kundër Venezuelës në eliminatoret e Kupës së Botës.
Ndërkohë, kujtojmë se Messi ka rinovuar kontratën me Inter Miami deri në vitin 2028, çka i garanton qëndrimin në futbollin konkurrues edhe pas turneut të madh të vitit 2026.
