Detaje të reja janë zbardhur në lidhje me hetimet ndaj kryebashkiakut të Kolonjës, Erion Isai, i cili u mor i pandehur nga SPAK.
Ai akuzohet për shkelje të barazisë në tendera apo ankande publike dhe Prokuroria e Posaçme e akuzon atë për përgjegjësi si titullar i autoritetit kontraktor, ndërsa hetimet janë zhvilluar në kuadër të bashkimit të dy procedimeve penale.
Një telefon i sekuestruar gjatë hetimeve ka nxjerrë në dritë biseda në aplikacionin “WhatsApp” mes kryebashkiakut Erion Isai dhe Entela Çano, administratore e kompanisë fituese të tenderëve, “A&E Engineering” sh.p.k si dhe shtetasit Armand Tafili, me detyrë përgjegjës i sektorit të prokurimeve në Bashkinë Kolonjë dhe Erjona Bujupit, punonjëse në kompaninë e Çanos.
Ndërkohë, nga hetimet është zbuluar se abuzimi me fondet publike arrin deri në shifrën 21 milionë lekë. Përveç kryebashkiakut Isai, të pandehur janë marrë edhe 6 zyrtarë të tjerë të Bashkisë Kolonjë, të cilët dyshohet se kanë bashkëpunuar në shkeljet e pretenduara.
Përmbajtja e bisedave të datës 01.07.2020:
10:05 – Erion Isai i shkruan Entela Çanos: “Mirëmëngjesi. Shifi pak këto: Po 110 max ose 90 i jep zgjidhje thuaj Entelës. Vetëm rrjeti i jashtëm deri depo fi 250 në 20 bar është 18 755 ml x 6793 lekë = 127 402 715 pa tush, kurse pesari fi 200 me gjatësi 1 880 x 4747 lekë = 8 924 360 lekë.”
10:06 – Entela Çano: “Mirëmëngjes… ok… më dërgo. Të njëjtën gjë po bëjmë edhe ne… reduktim parametrash.”
10:08 – Erion Isai: “Sa më shpejt pls.”
10:09 – Entela Çano: “Ok… pa merak.”
14:57 – Erion Isai: “Më duhet deri të premten. Më duhet lista me emrat e fshatrave dhe vlerat për çdo fshat, vëlla. Një zjarr të lutem.”
15:00 – Entela Çano: “Pa merak. Do bëj të pamundurën që të premten t’i dorëzojmë.”
15:01 – Erion Isai: “Je yll s’o dooa.”
21:22 – Erion Isai: “Kemi gati ndonjë preventiv të ndonjë fshati?”
21:24 – Entela Çano: “Nesër paradite mendoj se mund të kemi diçka. Po sforcohemi shumë për të arritur vlerën… 230 me TVSH. Jam e saktë? Ma konfirmo të lutem.”
21:24 – Erion Isai: “330 është max.”
21:25 – Entela Çano: “Shyqyr.”
21:28 – Erion Isai: “Pls zjarrrrr. Se nesër duhet me i printu. Vulos këtu te ue. Të premten në mëngjes herët duhen dorëzu.”
21:29 – Entela Çano: “Do bëj më të mirën e mundshme… por jam sforcuar shumë për të kapur vlerën.”
21:29 – Erion Isai: “Ishte teeeeper e lartë. As bëhej fjalë.”
21:30 – Entela Çano: “Me 5 aspra tha do verë të mirë miku: shprehje gjermane.”
Bisedat e datës 03.07.2020:
12:39 – 12:42 – Entela Çano ka katër thirrje të humbura nga Erion Isai.
12:46 – Erion Isai: “Shoqeeee.”
12:46 – Bëhet një bisedë telefonike mes Çanos dhe Isait.
12:46 – Çano: “Isha në telef, të më falësh.”
12:47 – 12:57 – Kryhen disa biseda telefonike midis dy personave.
Procedimi penal ndaj Erion Isait është regjistruar më 29 shkurt 2024, mbi bazën e kallëzimit të bërë nga shtetasi Esmerald Xhafa, për veprën penale “Shpërdorimi i detyrës”, sipas nenit 248 të Kodit Penal. Meqenëse bëhej fjalë për të njëjtin objekt hetimi si në procedimin penal nr. 280 të vitit 2020, me datë 22.07.2024 është vendosur bashkimi i të dyja çështjeve në një të vetme – nr. 280/2020.
Në qendër të hetimit janë tre tendera publikë:
- Ndërtimi i rrugës Korçë-Ersekë, Loti 2 (Pjesa e parë) – REF-69427-08-21-2020
- Supervizim punimesh për ndërtimin e rrugës Korçë-Ersekë, Loti 2 (Pjesa e parë) – REF-75548-10-14-2020
- Ndërtimi i ujësjellësit të Ersekës dhe disa fshatrave, faza e dytë nga burimet e Kozelit – REF-68285-08-11-2020
