Pak ditë pas ngjarjes ku humbi djalin e vogël në një atentat mafioz, është zbardhur dhe dëshmia e Mustafa Licit dhënë për policinë. Në deklarimin e tij, Mustafa Lici ka treguar se Hamza, djali i tij, nuk kishte asnjë rekord kriminal dhe se ishte besimtar i devotshëm i fesë myslimane.
Ditën e ngjarjes, Hamza ka qenë me Arlind Bushatin në automjet dhe ishin nisur për në Podgoricë, pasi dy djemtë e vrarë në atentat ishin shokë, nisur edhe nga fakti se prindërit e tyre njiheshin për miqësinë e tyre ndër vite.
Lici ka treguar se sapo kanë hyrë në Dobraç, ata janë qëlluar nga një pritë e organizuar prej anëtarëve të një grupi kriminal që janë të lidhur ngushtë me qeverinë.
Referuar dëshmisë së Mustafa Licit, vrasja e djalit të vogël ka tronditur familjen. Ai tregon se ai ishte i pafajshëm dhe se ekzekutimi i tij ka ardhur prej faktit se është vëllai i Ibrahim Licit.
Mustafa shton se djali i tij i madh, Ibrahim Lici, për të cilin u dyshua se ishte në makinë me viktimat dhe se u shfaq në një video teksa u jepte ndihmën e parë atyre, nuk është fare në Shqipëri dhe se jeton prej kohësh në Turqi.
Pyetjes së hetuesve nëse ka emra konkretë se kush mund ta ketë bërë atentatin ndaj djalit të tij, Mustafa Lici tregoi se ka dyshime tek disa persona, por është ende herët për të folur.
Kujtojmë se më 30 tetor, në drekë, në një atentat të mirëorganizuar, u vranë 23-vjeçari Hamza Lici, 32-vjeçari Arlind Bushati dhe çifti i bashkëshortëve Bashkim dhe Flutura Basha. Nga hetimet e deritanishme, policia ka shpallur në kërkim dy persona 22-vjeçarë, që njihen si anëtarë të fisit Bajri në Shkodër. Kjo ngre dyshime se vrasjet janë bërë për gjakmarrje, pasi prej vitesh mes fisit Bajri dhe Lici ka pasur përplasje që kanë shkaktuar mbi 20 viktima.
