Dinamo e drejtuar nga Ilir Daja nuk ia del dot të bëjë përmbylljen e madhe ndaj Jagiellonia dhe e mbyll këtu aventurën në Kupat e Europës. Ndeshja e parë kishte përfunduar 3-0 për polakët, ndërsa takimi i sotëm përfundoi në barazim 1-1.
“Blutë” e nisin shumë mirë takimin, duke rrezikuar që në minutën e parë me Nani. Goditja me kokë e mesfushorit përfundon fare pranë shtyllës. Në minutën e 17-të, Aldo Teqja me pritjen e tij shpëton Dinamon nga goli. Goditja me kokë e sulmuesit të polakëve ndalet në mënyrë të shkëlqyer nga Teqja.
Në minutën e 25-të, Lorenco Vila mund të bënte më mirë pas një aksioni që nisi nga goditja e këndit. Pjesa e parë mbyllet në barazim pa gola.
Në minutën e 57-të, Dejvi Bregu i afrohet shumë golit, por portieri mik bën një pritje spektakolare. Dy minuta më pas, Bregu bëhet sërish protagonist, ku kërkon penallti pasi u rrezua brenda në zonë, arbitri vazhdon lojën. Në minutën e 68-të do të ishte sërish Bregu, këtë herë duke dërguar topin në rrjetë me një goditje të bukur brenda zonës.
Megjithatë avantazhi i bluve do të zgjaste pak, pasi polakët do të barazonin shifrat me Rallis në minutën e 79-të, pasi një kundërsulmi të shpejtë duke përfituar nga përgjumja e “Bluve”. Rezultati përfundimtar, 1:1.
