Lucas Digne ka folur për herë të parë pas eliminimit të Francës nga Spanja në gjysmëfinalet e Kupës së Botës, një ndeshje ku mbrojtësi francez u vendos në qendër të kritikave.
Digne shkaktoi penalltinë ndaj Lamine Yamal, moment që i hapi rrugën Spanjës drejt fitores dhe kualifikimit në finale. Për më tepër, Didier Deschamps vendosi ta zëvendësonte rreth 20 minuta para fundit, pasi mbrojtësi nuk po arrinte të përballonte sulmet e vazhdueshme të talentit spanjoll.
Pas heshtjes së gjatë, Digne reagoi në Instagram me një mesazh emocional.
“Ja ku është, fundi i një ëndrre”, shkroi ai.
Mbrojtësi francez pranoi se zhgënjimi është shumë i madh, sidomos për veten dhe për skuadrën.
“Fundi i një ëndrre ndonjëherë mund të jetë i vështirë, dhe zgjimi edhe më brutal. Gjëja më e vështirë sot është të gjej fjalët për të shprehur këtë zhgënjim të madh. Para së gjithash jam i zhgënjyer nga vetja”, u shpreh Digne.
Ai shtoi se ndjen keqardhje edhe për ekipin, për punën e bërë dhe për tifozët që e mbështetën Francën gjatë gjithë turneut.
“Jam i zhgënjyer edhe për këtë skuadër, për të gjitha përpjekjet që bëmë dhe për këtë grup lojtarësh të jashtëzakonshëm. Mendoj edhe për të gjithë ata që udhëtuan për të na mbështetur, si dhe për ata që na ndoqën nga Franca dhe nga e gjithë bota”, vazhdoi ai.
Pavarësisht dhimbjes së eliminimit, Digne theksoi se ndihet krenar që ka përfaqësuar Francën.
“Mbështetja juaj na ka mbajtur gjatë kësaj aventure. Pavarësisht këtij zhgënjimi të madh, mbetem krenar që përfaqësova vendin tonë”, shkroi mbrojtësi.
Në fund, ai kujtoi se Botërori nuk ka përfunduar ende për Francën, pasi skuadra duhet të luajë ndeshjen për vendin e tretë.
“Nuk ka mbaruar ende, kemi një podium për të arritur”, përfundoi Digne.
Pas Kupës së Botës, Digne pritet të nisë një kapitull të ri në karrierë. Mbrojtësi do të shkojë me pushime pas ndeshjes për vendin e tretë, përpara se të bëhet pjesë e PSG-së së drejtuar nga Luis Enrique.
