Emiliano “Dibu” Martínez ka ngritur dyshime të mëdha për të ardhmen e tij me kombëtaren argjentinase pas humbjes në finalen e Kupës së Botës ndaj Spanjës.
Portieri i “Albiceleste”-s publikoi një mesazh emocional në Instagram, ku shprehu dhimbjen për disfatën dhe pranoi se duhet të reflektojë për vazhdimësinë e tij.
“Ëndërroja ta fitonim përsëri, ta çonim trofeun në Argjentinë dhe të shkruanim sërish historinë. Dhimbja është e vështirë për t’u shpjeguar. Ka shumë gjëra për të menduar, për mënyrën si duhet të vazhdoj dhe nëse ka ardhur momenti të tërhiqem”, shkroi Martínez.
“Dibu” kërkoi gjithashtu falje dhe theksoi se kishte dhënë maksimumin për vendin dhe shokët e skuadrës.
Mesazhi i tij shton pasigurinë rreth së ardhmes së Argjentinës, pasi edhe Lionel Scaloni e ka lënë të hapur vazhdimësinë, ndërsa ende nuk ka një vendim zyrtar nga Lionel Messi.
Martínez ishte një nga lojtarët më të mirë të Argjentinës në finale, duke bërë disa pritje vendimtare. Megjithatë, skuadra nuk arriti ta ndalte dominimin e Spanjës dhe krijoi shumë pak raste të rrezikshme.
